Türkiyede İslâm işbirligi teşkilâtınıñ tış işler nazirleri şurasınıñ sessiyasında qırımtatarlarnıñ aqları ile bağlı vaziyetni nezaret etmek içün imkânlar açqan qırımtatarlarğa dair qarar qabul etildi, dep bildirdi Meclis reisi Refat Çubarov.
Vesiqanıñ esas noqtalarından biri — siyasiy sebeplerden azatlıqtan marum etilgen qırımtatar halqınıñ mabüslerini azat etmek talabıdır.
"Qararda (belli ki, Rusiyege) siyasiy sebeplerden azatlıqtan marum etilgen qırımtatarlar azat etilsin, dep muracaat etile. Qarar İİT Baş kâtibi ve teşkilâtnıñ diger institutlarınıñ qırımtatar halqınıñ aqları vaziyetine dair monitoring ve tedqiqlerniñ keçirilmesinde doğrudan-doğru iştirak etmesine imkân bere", — dep yazdı Refat Çubarov Facebookta.
Aynı zamanda Meclis reisi qayd ete ki, rezolütsiyada Rusiye Federatsiyasınıñ areketlerini takbih etmek içün açıq ve doğru sözler yoq. Onıñ fikrine köre, bunıñ sebebi İİT aza devletleriniñ bir qısmı Rusiyeniñ Ukrayinağa qarşı istilâsını açıqtan-açıq takbih etmesidir.
"Buña köre, Qırımtatar Milliy Meclisi, Rusiye tarafından işğal etilgen Qırımda tamır qırımtatar halqınıñ taqip etilmesinen bağlı kerçek vaziyet aqqında olarnıñ haberdarlığını arttırmaq maqsadınen İİT aza devletlerinen işbirlikni quvetleştirmeli", — dep qoştı Çubarov.
İlk yaz ayınıñ 22-nde İstanbulda İslâm işbirligi teşkilâtınıñ tış işler nazirleri şurasınıñ eki künlik sessiyası yekünlendi. Bu halqara ükümetlerara teşkilât, siyasiy, iqtisadiy, medeniy ve gumanitar meselelerni beraber çezmek ve musulman dünyasınıñ menfaatlarını qorçalamaq içün musulman devletlerini birleştire.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegramve İnstagram saifelerinden taqip etiñiz.
