İlk yaz ayınıñ 23-ne keçken gecesi Rusiye ordusu Ukrayinağa 368 ava ücümi vastası ile ücüm etti: 352 "Şahed" tipindeki ücüm dron ve pilotsız uçaq, em de 11 "İskander-M"/KN-23 ballistik raketa ve beş "İskander-K" qanatlı raketa, dep bildirdi Ukrayina Silâlı quvetleriniñ Ava quvetleri.
Arbiylerniñ aytqanına köre, ücümniñ esas yönelişi Kıyiv edi.
"İlk malümatlarğa köre, saat 9-da olğan malmatqa köre, ava mudafaası küçleri tarafından 354 duşman avadan ücüm vastaları yoq etildi: 158 ateş vastaları ile urulğan, 196 ğayıp olğan: 146 "Şahed" tipindeki (ve diger tiplerdeki) dronları ateş vastaları ile urulğan, 193 yerinden ğayıp olğan ya da REB vastaları ile bastırılğan; yedi İskander-M/KN-23 ballistik raketa urulğan, daa üç yerinden ğayıp olğan; beş İskander-K qanatlı raketa urulğan", — dep aytıla haberde.
Arbiylerniñ malümatına köre, altı yerge darbe endirilgen, Kıyiv ve Kıyiv vilâyetiniñ 25 yerinde ise parçalar tüşken
Yerli akimiyet ve qurtarıcılarnıñ malümatına köre, Kıyivde ilk yaz ayınıñ 23-ne keçken gecesi Rusiye ücüminiñ neticesinde kiriş qapusı yıqılğan Şevçenko rayonındaki evde altı adam elâk olğanı belli oldı. Bundan ğayrı, şeer boyunca 19 yaralanğan kişi aqqında malümat keldi.
Rusiye arbiyleri çeşit silâ qullanıp, muntazam sürette Ukrayina regionlarına ücüm ete.
Rusiye akimiyeti, Rusiye ordusı Ukrayinanıñ şeer ve köyleriniñ grajdan infrastrukturalarına, tınç ealini öldürgenine, hastahaneler, mektepler, bala bağçaları, energetika ve suv teminlevi obyektlerini yoq etkenine red ete.
Ukrayina akimiyeti ve halqara teşkilâtlar bu darbelerni Rusiye Federatsiyasınıñ arbiy cinayetleri olaraq tanıy ve olarnıñ maqsatlı olğanını qayd ete.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegramve İnstagram saifelerinden taqip etiñiz.
