Ukrayina tış işler naziri Andriy Sıbiğa, işğal etilgen Qırımda tutulğan soñ dört yıldan ziyade Rusiye apishanesinde yatqan Qırım.Aqiqat jurnalisti Vladislav Yesipenkonıñ azat etilmesine seslendi.
Tış işler naziri, Yesipenkonı Varşava ava limanında qarşılağanın bildirdi: o, Brükselge yol tuta edi, jurnalist ise Pragağa.
"Vladislavnı Rusiye esirliginden azat etilgeni ile hayırladım. Ukrayina Tış işler nazirligi Vladislavnıñ azat etilmesi içün küreşip, bu meseleni bütün halqara meydançıqlarda kötergen edi. Şimdi o, azatlıqta, onı şahsen tebriklemekten memnünim", — dep aytıla haberde.
Sibiga, Azatlıq Radiosınıñ muarririyetini tebriklep, Yesipenkonıñ ikâyesi adalet içün küreşniñ müimligini hatırlatqanını qayd etti.
"Er bir siyasiy mabüsniñ azat etilmesi içün küreşmege devam etecekmiz. Qanunsız tutulğan vatandaşlarımıznıñ episi azat etilmegence ve qorantalarına qaytarılmağanına qadar raat olmaycaqmız", — dedi o.
Vladislav Yesipenko — Qırım.Aqiqat leyhasınıñ jurnalisti (Azatlıq Radiosı). O, Qırımdaki içtimaiy ve ekologik meselelerni aydınlata, soqaq soravlarını ve işğal etilgen yarımadada ayat aqqında reportajlarnı çıqara edi. 2021 senesi saban ayınıñ 10-nda Rusiye FSB-siniñ hadimleri tarafından Ukraina mahsus hızmetleri içün malümat toplağanında ve maşnasında "öz başına yapılğan patlav cihazını" saqlağanında qabaatlanıp tutulğan edi.
27 kün devamında jurnalistke mustaqil advokatlar yiberilmedi. Aynı zamanda "Krım 24" devlet telekanalı, Qırım.Aqiqat leyhası içün çalışqanını tasdıqlağan Yesipenko ile intervyü yayınladı.
2022 senesi Qırımnıñ Rusiye kontrolindeki mahkeme Yesipenkonı beş yılğa azatlıqtan marum etmege ve 110 biñ ruble para cezasını tölemege üküm etti. Rusiye prokuraturası onıñ içün 11 yıl istedi. Yesipenkonıñ özü mahkemede Rusiye quvetçileri onı işkencege oğratqanını beyan etti.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegramve İnstagram saifelerinden taqip etiñiz.
